დასრულდა ორწლიანი სასკოლო პროექტი ,,ეთნოტური საქართველოში“ , რომელიც განხორციელდა სკოლა ,,პოლიგლოტის“ ჰუმანიტარულ – საზოგადოებრივი მეცნიერებებისა და ესთეტიკურ – სპორტული აღზრდის კათედრის ინიციატივით, დაიწყო 2021-2022 სასწავლო წელს და დასრულდა 2022-2023 სასწავლო წლის ივნისში. პროექტში მონაწილეობა მიიღეს მოსწავლეებმა, პედაგოგებმა და მშობლებმა. 
პროექტის მიზანი იყო:
➢ საქართველოს მხარეების ეთნოგრაფიულ-გეოგრაფიული და ისტორიულ-კულტურული ღირსშესანიშნაობების შესწავლა ;
➢ მატერიალური და არამატერიალური კულტურული მემკვიდრეობის ძეგლების გაცნობა ;
➢ საქართველოს ღირსშესანიშნაობების დათვალიერება, სასწავლო – შემეცნებითი ექსკურსიების მოწყობა;
➢ ღია გაკვეთილების, დისკუსიებისა და პრეზენტაციების გამართვა;
➢ ბროშურების, სარეკლამო ბუკლეტებისა და შემაჯამებელი აქტივობების აღსაწერად ჟურნალის შექმნა.
ჩატარდა პროექტის შემაჯამებელი ღონისძიება, რომელსაც წარუძღვა ჰუმანიტარულ-საზოგადოებრივი მეცნიერებებისა და ესთეტიკურ- სპორტული აღზრდის კათედრის ხელმძღვანელი, გეოგრაფიის მასწავლებელი, ნინო წამალაშვილი. მან ისაუბრა განხორციელებულ აქტივობებზე და აღნიშნა, რომ ამ გრანდიოზულმა პროექტმა გააერთიანა მთელი სასკოლო საზოგადოება, განამტკიცა თანამშრომლობითი ურთიერთობა, აამაღლა მოსწავლეთა ცნობიერება, წიგნიერება და შემოქმედებითი უნარები. ღონისძიება მუსიკალურად გააფორმა ანი ზაზაშვილმა, რისთვისაც დიდ მადლობას ვუხდით მას. 
დასკვნით ღონისძიებაზე მე-5 კლასიდან მე-11 კლასის ჩათვლით მოსწავლეებმა წარმოადგინეს საქართველოს კუთხეები, ისაუბრეს ჩვენი ქვეყნის მატერიალური და არამატერიალური კულტურული მემკვიდრეობის ძეგლებისა და ღირსშესანიშნაობების შესახებ. ღონისძიების დასასრულს სკოლის დირექტორმა, ქალბატონმა მზია დაუშვილმა, მადლობა გადაუხადა პროექტის ხელმძღვანელს, ანა ჯავახიშვილს, გაწეული შრომისთვის და ყველა მონაწილეს, განსაკუთრებით კლასის ხელმძღვანელებს აქტიურობისა და საკუთარი გაღებული წვლილისათვის. მზადდება პროექტის ფარგლებში განხორციელებული აქტივობების ამსახველი ჟურნალი, რომლის პრეზენტაციასაც დასრულებისთანავე შემოგთავაზებთ.
