სკოლა პოლიგლოტმა ტრადიციულად წელსაც მიიღო მონაწილეობა ენების ევროპული დღის აღსანიშნავ ღონისძიებაში. სკოლაში დაიგეგმა და განხორციელდა მრავალი საინტერესო, შემეცნებითი თუ გასართობი ღონისძიება.
მოსწავლეებმა მასწავლებლების დახმარებით შეისწავლეს დაქტილი ე.წ ყრუ და სმენადაქვეითებულების ანბანი, შექმნეს ენების ხის მაკეტი, პოსტერები, კედლის გაზეთი, კომიქსების წიგნაკი და სხვა მრავალი პროდუქტი ენობრივი მრავალფეროვნების მნიშვნელობის ხაზგასასმელად.
ენების ევროპული დღის აღნიშვნა მნიშვნელოვანია, რადგან ის ხელს უწყობს ტოლერანტობის, კულტურული მრავალფეროვნებისა და ქვეყნებს შორის ურთიერთპატივისცემის განვითარებას. ამ დღის ფარგლებში მიღებული გამოცდილება მოსწავლეებს აძლევს შესაძლებლობას უკეთ გაიგონ სხვადასხვა ერების კულტურა, დააფასონ ენობრივი განსხვავებები, შეისწავლონ რაც შეიძლება მეტი ევროპული ენა, რადგან ეს ხელს შეუწყობს მათ ერთიან ევროპულ ოჯახში ინტეგრაციას.
